15 декабрьдә Даниянең Хернинг шәһәрендә кыска дистанцияләрдә суда йөзү буенча Европа чемпионаты тәмамланды. Нәтиҗәләр буенча, Россия җыелма командасы беренче урынны яулады. Аның составында тамырлары белән Түбән Новгород өлкәсе Пильна районы Сафаҗай авылыннан булган 16 яшьлек Розалия Насретдинова да бар иде.
Аның турында тулырак информацияне безгә Сафаҗай мәктәбе директоры Рамил Мусин бирде:
– Розалиянең әтисе Хайдәр Насретдинов Сафаҗай мәктәбен тәмамлап, Мәскәүгә китеп урнашты, Бозлау кызы Галия белән гаилә корды. Хайдәр үзе яшь вакытта спорт белән актив шөгыльләнде, волейбол белән мавыкты. Спортны яратканга күрә ул кызын “Локомотив” спорт мәктәбенең йөзү секциясенә бирә. Без, сафаҗайлылар, Даниядән трансляцияләрне карап, Розалия өчен җан аттык һәм ул безнең өметләрне аклады, - дип сөйләде Рамил әфәнде.
Ә без сезнең игътибарга “Локомотив” спорт мәктәбе сайтыннан алынган мәгълүматны да тәкъдим итәбез: Розалия 1997 елның 10 февралендә Мәскәүдә туа, бала чактан йөзү белән мавыга, аның дистанцияләре - 50, 100, 200 метр. Ул инде Халыкара спорт мастеры исеменә ия. 2011-12 елларда Розалия төрле дистанцияләрдә Россия чемпионы исемен яулый, ә үткән елны яшүсмерләр арасында узган Европа чемпионатында зур җиңүләргә ирешә.
Даниядә үткән ярышларда яшь йолдызчыгыбыз катнаш эстафеталарда ике алтын медаль яулады. Ә бит аңа әле 17 яшь тә юк. Без Розалиягә киләчәктә тагын да югарырак үрләрне яулап, милләтебезнең, туган авылының данын дөнья йөзенә танытуын телибез.
И. САДЕКОВ
в„– |