Ил Хөкүмәте җәмәгать урыннарында тәмәке тартуны тыю мәсьәләсен инде октябрь аенда ук тикшермәкче. Әлеге яңалыкны үзенең видеоблогында Россия Премьер-министры Дмитрий Медведев хәбәр иткән.
“Ресторан, кафе, барларда тәмәке тартуны тыю башка илләрдәге кебек этаплап тормышка ашырылачак. Тормышка ашырылып бетү вакыты 2015 елның 1 гыйнвары”, – дигән Хөкүмәт башлыгы. Моннан тыш, Медведев фикеренчә, җәмәгать урыннарында тарту һәм адым саен тәмәке сатуны гына түгел, ә тәмәке рекламасын да тулысынча тыярга һәм тәмәке җитештерүчеләргә салымны сизелерлек дәрәҗәдә арттырырга кирәк. Тәмәкегә салымны арттырудан кергән табыш хисабына сәламәтлек саклау өлкәсенең бюджеты тулыланачак дип искәрткән Медведев.
Видеомөрәҗәгатендә Россия Премьер-министры статистика мәгълүматларын да китергән. Бүгенгә үзләре тәмәке тартмаганнарның 60 проценты, ә балаларның барысы да агулы тәмәке төтенен суларга мәҗбүр икән. Россия халкының өчтән бере эш урынында тәмәке төтене сулый икән, илнең 44 миллион халкы көндәлек никотин дозасына бәйлелек кичерә.
Закон кабул ителгәч, шәһәр һәм шәһәр яны транспортында, вокзал, аэропорт, метро станцияләрендә, мәгариф, мәдәният, спорт, социаль хезмәтләр, хакимият органнары биналарында, балалар мәйданчыкларында һәм комлыкларда тәмәке тарту законсыз гамәл дип саналачак. 2014 елның 1 июленнән медицина хезмәтләре күрсәтелә торган урыннарда, санаторий, еракка йөрүче поезд, самолет, кунакханә, базар һәм кибетләрдә тартуны тыячаклар. Әмма әлегә аларда моның өчен махсус урыннар булдырырга рөхсәт ителә.
№205 | 17.10.2012