Казанда Галиәсгар Камал исемендәге татар дәүләт академия театрының зур тамаша залында Самара өлкәсенең Камышлы районында туып үскән күренекле якташыбыз - Габдулла Тукай исемендәге Дәүләт бүләге лауреаты, Татарстанның халык шагыйре Рөстәм Гали улы Мингалимовка 75 яшь тулуга багышланган иҗат кичәсе үткәрелде. Ни кызганыч, озакка сузылган авыруы аркасында, моннан биш ел элек 70 яшьлеген үткәргәндәге кебек үк, бу юлы да юбиляр үзенең гомер бәйрәменә килә алмады. Кичәдә аның хатыны Илүсәр ханым, кызлары Айсылу белән Алсу, кияве Сөләйман катнаштылар.
Самарадан бәйрәмгә ша-гыйрьнең якташлары – өлкә “Дуслык” татар җәмгыяте пре-зидентының киңәшчесе Идеал Галәүтдинов, оешманың интернет-сайты мөхәррире Римма Нуретдинова, өлкә “Туган тел” татар җәмгыяте директоры Данияр Сәйфиев һәм мин, “Бердәмлек” өлкә татар газетасының баш мөхәррире Рәфгать Әһлиуллин, бардык.
Камышлыдан район башлыгы урынбасары Минсәгыйть Шәйхетдинов, районның мә-дәният бүлеге мөдире Раилә Сафина, Камышлы авылы җир-леге җитәкчесе Заһит Сафин килгәннәр иде.
Без юбилярның кичәдә була алмаячагын белгәч, чара башланыр алдыннан якташыбызны өенә барып котладык, акчалата бүләкләребезне тапшырдык.
Идеал Галәүтдинов үзенең тальян гармунына кушылып җырлап, шагыйрьгә җыр бүләк итте. Бу мизгелләрдә Рөстәм аганың йөзе тагын да нурланыбрак, яктырыбрак киткәндәй булды. Ул туган авылында яшәгән балачак, яшүсмер елларын, әти-әнисен, туганнарын, авылдашларын хәтеренә төшергәндер, мөгаен.
Үзенең бер шигырендә ул болай язган иде:
Яшем арткан саен арта барып,
Зурайды шул бәхетем бик күпкә;
Бер кешенең бәхете, бәлкем, җирдә
Тиң түгелдер минем бәхеткә.
Һич бетәрлек түгел минем,
Минем бәхетем - Җиргә килүемдә.
Минем бәхетем - бөтен бәхетсезне,
Бөтен бәхетлене сөюемдә!
Әйе, бәхетне төрле кеше төрлечә аңлый шул ул. Кемгә зур байлык, дәрәҗә бәхет булып күренсә, ә Рөстәм агага, түшәк өстендә авырып ятканда, туган якларыннан хәбәрләр, җырлар ишетү үзенә күрә бер зур бәхет иде.
Камал театрының зур тамаша залын тутырып килгән тамашачы алдында берничә дистә нәфис сүз осталары, җырчылар катнашында ике сәгатьтән артык дәвам иткән шагыйрьнең иҗат кичәсе сизелмичә дә үтеп китте.
“Бердәмлек”нең киләсе саннарының берсендә якташы-бызның “Яратам шул бу дөньяны...” дип аталган гомер бәйрәме турында без фоторәсемнәр белән бизәп, тәфсилләп язарга планлаштырабыз.
РӘСЕМДӘ: Рөстәм МИНГАЛИМ һәм аның гаилә әгъзалары юбилярны котларга Самарадан килгән якташлары белән.
Рәфгать ӘҺЛИУЛЛИН
№ | 17.11.2012
