Т. Новгород өлкәсе Кызыл Октябрь районы Кызьмавыл башлангыч мәктәбе бинасында узган елның августыннан башлап дини укулар үткәрелә. Өч еллык курсалардан соң бу уку йортының шәкертләре мөгаллим һәм имам таныклыгы алып, авылларыбызга Ислам нуры таратырлар.
- Районыбызда мәдрәсә булдыру минем күптәнге хыялым иде. Рәхмәт Кызыл Октябрь районы үзидарә башлыгы Халит абый Сөләймановка, ул тәкъдимемне хуплады, дәресләр үткәрергә җылы, якты бина бирде. Бүгенгә “Нур Аль-Ильм” мәдрәсәсенең беренче курсында 26 шәкерт 9 дисциплина буенча белем ала. Аларның белемнәрен кышкы һәм язгы сессияләрдә имтиханнар ярдәмендә тикшерәбез. Сынау узганнары укуларын дәвам итә. Уку йорты өлкә Диния нәзарәте канат астында эшли һәм мәдрәсәне уңышлы тәмамлаган шәкертләребез тиешле стандартта таныклык алырлар. Мәдрәсәнең иң яхшы укучысын әйтми узалмыйм, ул да булса Рауза апа Хөсәинова, барлык дәресләрне дә “5”кә генә үзләштерә.
Популярлыгыбыз көннән-көн арта бара, шуңа күрә киләсе уку елына күбрәк шәкертләр көтәбез. Мәдрәсәдә белем алырга теләк белдереп шалтыратучылар бүгеннән үк бик күп.
Киләчәккә планнар турында да әйтеп үтәсе килә. Иң мөһиме – район үзәгендә үзебезгә аерым бина булдыру, әлбәттә. Бу изге эштә мөфтият һәм спонсорлар ярдәменә ышанабыз. Шулай Алла ярдәме белән милли районда дини гыйлем йорты булдырасы иде, - дип сөйләде Карга авылы имамы “Нур Аль-Ильм” мәдрәсәсе җитәкчесе Дамир хәзрәт Каюмов.
Әйе, милли районда дин әһелләрен әзерләү-че уку йорты бик кирәк. Ә район башлыкларының, өлкә Диния нәзарәтенең яшь имамның бу инициативасын хуплаулары, аңа һәрчак ярдәм итүләре куаныч, әлбәттә. Мондый хезмәттәшлек Уразавылда зур, якты һәм иң мөһиме – үз бинасында урнашкан мәдрәсә булуга ышаныч тудыра. Изге эшегез уңышлы булсын, Дамир хәзрәт.
Р.ТИМЕРШИН
в„– |