Татарстан композиторлары иҗатыннан торган антология Казанга кайты. Александр Сладковский җитәкчелегендәге Татарстан дәүләт симфоник оркестры әзерләгән диск-җыентыкны тәкъдим итү кичәсе 23 гыйнварда С.Сәйдәшев исемендәге Зур концерт залында узачак.
Музыкаль җыентык Казанның Зур концерт залында яздырылды һәм Sony Music һәм RCA Red Seal Records лейбллары белән чыкты. Мәгълүм булганча, дәүләт симфоник оркестрының сәнгать җитәкчесе һәм баш дирижеры Александр Сладковский мондый күләмле һәм дәрәҗәле музыкаль проект хакында күптәннән хыялланган. Проектны тормышка ашыру өчен оркестрда ике ел буе тынгысыз хезмәт барган.
Җыентыкка Татарстан композиторлары – Нәҗип Җиһанов, Салих Сәйдәшев, Фасыйл Әхмәтов, Алмаз Монасыйпов, Фәрит Яруллин, Рәшид Кәлимуллин, Шамил Тимербулатов, Анатолий Луппов, Ренат Еникиев, Радик Сәлимов, Мәсъгүдә Шәмсетдинова, Алена Анисимова, Резидә Ахиярова, Зөлфия Раупова, Александр Миргородский иҗаты кергән. Дискларга шулай ук Сергей Рахманиновның “Остров мертвых” һәм Александр Чайковскийның “Стан Тамерлана” әсәрләре дә керәчәк. Барлыгы өч диск дөнья күрә.
“Минем өчен җыентык чыгару мөһим мәсьәлә. Безнең төп максатыбыз - милли-мәдәни мирасыбызны саклап калу һәм башкаларга таныту. Татар музыкасының дөньяда киң танылуын телим. Чөнки милли музыкабызның яңгырашы башкаларныкыннан нык аерылып тора”, - ди Татарстан дәүләт симфоник оркестры җитәкчесе Александр Сладковский.
Диск-җыентыкны тәкъдим итү тантанасына Sony Music Entertainment компаниясенең директоры Ян Хендерсон һәм “B-Sharp” Берлин студиясенең продюссеры Филипп Нидель килүе көтелә. Концертны Россиянең халык артисты Святослав Бэлза алып барачак.
Татарстан композиторлары антологиясе сәүдә нокталарына чыгарылмаячак. Республиканың музыкаль мәдәниятен күрсәтүче дисклар Универсиадага килгән кунакларга, чит илләргә сәяхәт кылганда таратылачак. Шулай ук, үзенчәлекле музыкаль җыентык 23 гыйнвар көнне дискны тәкъдим итү концертына килүчеләргә дә бүләк ителә.
Мөршидә КЫЯМОВА
в„– | 14.01.2013